Ek Kafir Se Mohabbat Ho Gai

ek kāfir se mohabbat ho ga.ī

zindagī kaTnī musībat ho ga.ī

har tamannā dil se ruḳhsat ho ga.ī

aas kyā TuuTī ki fursat ho ga.ī

ishq ne pahuñchā diyā is haal ko

dekhne vāloñ ko ibrat ho ga.ī

ab na chāheñge kisī ko bhuul kar

tum ko dil de kar nasīhat ho ga.ī

ye junūn-e-ishq ke andāz haiñ

apne saa.e se bhī vahshat ho ga.ī

jis ne us ko pā liyā vo kho gayā

jis ne dekhā us ko hairat ho ga.ī

dil meñ hī rakhnī thī ‘shañkar’ dil kī baat

muñh se niklī to shikāyat ho ga.ī

Leave a Comment