ek kafir se mohabbat ho ga.i
zindagi kaTni musibat ho ga.i
har tamanna dil se ruḳhsat ho ga.i
aas kya TuuTi ki fursat ho ga.i
ishq ne pahuncha diya is haal ko
dekhne valon ko ibrat ho ga.i
ab na chahenge kisi ko bhuul kar
tum ko dil de kar nasihat ho ga.i
ye junun-e-ishq ke andaz hain
apne saa.e se bhi vahshat ho ga.i
jis ne us ko pa liya vo kho gaya
jis ne dekha us ko hairat ho ga.i
dil men hi rakhni thi ‘shankar’ dil ki baat
munh se nikli to shikayat ho ga.i
Leave a Reply