ḳhabt-e-azmat men giraftar nahin bhi hote
log kuchh ba.is-e-azar nahin bhi hote
pas-e-bazar bhi bik jaate hain bikne vaale
kitne saude sar-e-bazar nahin bhi hote
yuun bhi hota hai kisi pal ki mozahim halat
raah de dete hain divar nahin bhi hote
ik tamasha sa ba-har-hal laga rahta hai
manzar-e-am pe kirdar nahin bhi hote
baar to hote hain duniya ke jhamele aksar
vaise kuchh baar giran-bar nahin bhi hote
parsa.i bhi kahin Dhong hua karti hai
kuchh gunahgar gunahgar nahin bhi hote
Leave a Reply