saliqa hai mujhe taron se lau lagane ka
ki main charagh nahin daagh ke gharane ka
vo dekh barf ke phulon men jagti hai sahar
yahi hai kya tira andaz muskurane ka
ḳhulus shart hai pi lunga zahr bhi ai dost
to pahle siikh mujhe Dhang azmane ka
liya jo shaḳh-e-gul-e-tar ko jhuk ke banhon men
vo ik bahana tha tujh ko gale lagane ka
chali jo yaad tumhari alakh jagati hui
bhaTak gaya koi jogi kisi Thikane ka
uḌuun to chuum luun tujh ko ki ek jugnu huun
tu ḳhvab hai kisi parbat ke shamiyane ka
miri lagan ka safina na Duub jaa.e kahin
tira vajud bhanvar hai kisi bahane ka
tire kalam tire jaam tere naam se ‘prem’
chamak raha hai sitara tire zamane ka
Leave a Reply