khumar-barabankavi

Kya Hua Husn Hai Ham-Safar Ya Nahin

kya hua husn hai ham-safar ya nahin

ishq manzil hi manzil hai rasta nahin

do parinde ude aankh nam ho gai

aaj samjha ki main tujh ko bhula nahin

tark-e-mai ko abhi din hi kitne hue

kuchh kaha mai ko zahid to achchha nahin

har nazar meri ban jaati zanjir-e-pa

us ne jaate hue mud ke dekha nahin

chhod bhi de mira saath ai zindagi

mujh ko tujh se nadamat hai shikva nahin

tu ne tauba to kar li magar ai ‘khumar’

tujh ko rahmat pe shayad bharosa nahin

More Poems

Leave a Comment