Aane Wali Nasl Ka Tohfa

Abu Bakr Abbad

chalo ik vaada karte hain

ki ham aur aap sab bhi

zehn aur dil ki kudurat saaf karte hain

be-imani par diyanat kibr par ikhlas ko

nafraton ke zahr par pyaar ki mithas ko

ham ghalib karte hain

chalo ham ye bhi karte hain

ki ahl-e-haq ko un ka haq dilate hain

jo mujrim hain unhen mujrim hi kahte hain

fareb-o-maslahat ko aap bhi aur ham bhi chhoden

qadam boson ke bhayanak ghol ko jo dimak-o-jarasim ki surat

nizam-e-fikr-o-fan barbad karta hai

use ham duur rakhte hain use mazmum kahte hain

suna hai jis zamin jis qaum se sachchai jaati hai

to us ke saath hi iman aur insaf jaata hai

to apne taur par in tinon ko ham thame rakhte hain

chalo ham aisa karte hain

zaif-o-tifl ko bahu ko betiyon ko maan ko ham mushtarka kahte hain

dharm aur zaat ke

qasrat-o-qillat ke saare phulon ko chun kar

unhen khush-rang karte hain hasin maala pirote hain

chalo ham aisa karte

ye tohfa aane vaali nasl ko ham pesh karte hain