tum achchhe masiha ho dava kyon nahin dete
be-nur jo hai sham.a bujha kyon nahin dete
be-nam huun be-nang huun zahir to hai tum par
gar rabt nahin dil se bhula kyon nahin dete
ḳhushbu kei tarah phuul kei uThunga chaman se
tum phuul ko zulfon se gira kyon nahin dete
pahunchunga kashakash men jahan tum ne bulaya
tum hashr ke maidan se sada kyon nahin dete
mahfil men agar raunaq-e-mahfil hai koi aur
ye baat bhi mahfil ko bata kyon nahin dete
ik buund si larzan hai sar-e-chashm-e-tamanna
nayab nahin aab gira kyon nahin dete
na-karda gunahon kei saza maut mili hai
phir karda gunahon kei saza kyon nahin dete
zaḳhmon ko mire dil pe agar dekh liya hai
daman se vafaon kei hava kyon nahin dete
dekha tha kabhi ham ne mohabbat ka janaza
baaqi hai agar kuchh to dikha kyon nahin dete
har lamha hamara hi fasana hai zaban par
ham kuchh bhi nahin hain to bhula kyon nahin dete
kar lenge har ik manzil-e-dushvar ko sar ham
ik jaam mohabbat ka pila kyon nahin dete
Leave a Reply