Hasrat Mohani
nazzara-e-paiham ka sila mere liye hai
har samt vo rukh jalva-numa mere liye hai
us chehra-e-anvar ki ziya mere liye hai
vo zulf-e-siyah tab-e-dota mere liye hai
zinhar agar ahl-e-havas tujh pe fida huun
ye martaba-e-sadq-o-safa mere liye hai
ban kar main razakar muhayya-e-fana huun
avaza-e-haq bang-e-dara mere liye hai
khush-nudi-e-fujjar ke pairav hain yazidi
taqlid-e-shah-e-karb-o-bala mere liye hai
mahrum huun majbur huun be-tab-o-tavan huun
makhsus tire gham ka maza mere liye hai
sarmaya-e-rahat hai fana ki mujhe talkhi
is zahr men saman-e-baqa mere liye hai
jannat ki havas ho to main kafir ki pareshan
us shokh ki khushbu-e-qaba mere liye hai
pahle bhi kuchh ummid na thi charagaron ko
aur ab to dava hai na dua mere liye hai
mar jaunga mai-khane se nikla jo kabhi main
nazzara-e-mai ruh-faza mere liye hai
tashkhis-e-tabiban pe hansi aati hai ‘hasrat’
ye dard-e-jigar hai ki dava mere liye hai
Leave a Reply