jab aadmi ke haal pe aati hai muflisi
kis kis tarah se us ko satati hai muflisi
pyasa tamam roz bithati hai muflisi
bhuka tamam raat sulati hai muflisi
ye dukh vo jaane jis pe ki aati hai muflisi
kahiye to ab hakim ki sab se badi hai shaan
taazim jis ki karte hain to ab aur khaan
muflis hue to hazrat-e-luqman kiya hai yaan
iisa bhi ho to koi nahin puchhta miyan
hikmat hakim ki bhi dubati hai muflisi
jo ahl-e-fazl aalim o fazil kahate hain
muflis hue to kalma talak bhuul jaate hain
vo jo gharib-ghuraba ke ladke padhate hain
un ki to umr bhar nahin jaati hai muflisi
muflis kare jo aan ke mahfil ke biich haal
sab janen rotiyon ka ye daala hai is ne jaal
gir gir pade to koi na liye use sambhal
muflis men hoven laakh agar ilm aur kamal
sab khaak bech aa ke milati hai muflisi
jab rotiyon ke batne ka aa kar pade shumar
muflis ko deven ek tavangar ko chaar chaar
gar aur mange vo to use jhidken baar baar
muflis ka haal aah bayan kya karun main yaar
muflis ko is jagah bhi chabati hai muflisi
muflis ki kuchh nazar nahin rahti hai aan par
deta hai apni jaan vo ek ek naan par
har aan tuut padta hai roti ke khvan par
jis tarah kutte ladte hain ik ustukhvan par
vaisa hi muflison ko ladati hai muflisi
karta nahin haya se jo koi vo kaam aah
muflis kare hai us ke taiin insiram aah
samjhe na kuchh halal na jaane haram aah
kahte hain jis ko sharm-o-haya nang-o-nam aah
vo sab haya-o-sharm udati hai muflisi
ye muflisi vo shai hai ki jis ghar men bhar gai
phir jitne ghar the sab men usi ghar ke dar gai
zan bachche rote hain goya naani guzar gai
ham-saya puchhte hain ki kya daadi mar gai
bin murde ghar men shor machati hai muflisi
lazim hai gar ghami men koi shor-ghul machae
muflis baghair gham ke hi karta hai haae haae
mar jaave gar koi to kahan se use uthae
is muflisi ki khvariyan kya kya kahun main haae
murde ko be kafan ke gadati hai muflisi
kya kya muflisi ki kahun khvari phakadiyan
jhadu baghair ghar men bikharti hain jhakadiyan
kone men jaale lapte hain chhappar men makadiyan
paisa na hove jin ke jalane ko lakdiyan
dariya men un ke murde bahati hai muflisi
biibi ki nath na ladkon ke hathon kade rahe
kapde miyan ke baniye ke ghar men pade rahe
jab kadiyan bik gaiin to khandar men pade rahe
zanjir ne kivad na patthar gade rahe
akhir ko iint iint khudati hai muflisi
naqqash par bhi zor jab aa muflisi kare
sab rang dam men kar de musavvir ke kirkire
surat bhi us ki dekh ke munh khinch rahe pare
tasvir aur naqsh men kya rang vo bhare
us ke to munh ka rang udati hai muflisi
jab khub-ru pe aan ke padta hai din siyah
phirta hai bose deta hai har ik ko khvah-makhvah
hargiz kisi ke dil ko nahin hoti us ki chaah
gar husn ho hazar ruupe ka to us ko aah
kya kaudiyon ke mol bikati hai muflisi
us khub-ru ko kaun de ab daam aur diram
jo kaudi kaudi bose ko raazi ho dam-ba-dam
topi purani do to vo jaane kulah-e-jism
kyunkar na ji ko us chaman-e-husn ke ho gham
jis ki bahar muft lutati hai muflisi
ashiq ke haal par bhi jab aa muflisi pade
maashuq apne paas na de us ko baithne
aave jo raat ko to nikale vahin use
is dar se yaani raat o dhanna kahin na de
tohmat ye ashiqon ko lagati hai muflisi
kaise hi dhum-dham ki randi ho khush-jamal
jab muflisi ho kaan pade sar pe us ke jaal
dete hain us ke naach ko thatthe ke biich daal
nache hai vo to farsh ke uupar qadam sambhal
aur us ko ungliyon pe nachati hai muflisi
us ka to dil thikane nahin bhaav kya batae
jab ho phata dupatta to kaahe se munh chhupae
le shaam se vo subh talak go ki nache gaae
auron ko aath saat to vo do take hi paae
is laaj se ise bhi lajati hai muflisi
jis kasbi randi ka ho halakat se dil hazin
rakhta hai us ko jab koi aa kar tamash-bin
ik paun paise tak bhi vo karti nahin nahin
ye dukh usi se puchhiye ab aah jis ke taiin
sohbat men saari raat jagati hai muflisi
vo to ye samjhe dil men ki dhela jo paungi
damdi ke paan damdi ke missi mangaungi
baaqi rahi chhadam so paani bharaungi
phir dil men sochti hai ki kya khaak khaungi
akhir chabina us ka bhunati hai muflisi
jab muflisi se hove kalavant ka dil udaas
phirta hai le tambure ko har ghar ke as-pas
ik paav ser aane ki dil men laga ke aas
gori ka vaqt hove to gaata hai vo babhas
yaan tak havas us ke udati hai muflisi
muflis biyah beti ka karta hai bol bol
paisa kahan jo ja ke vo laave jahez mol
joru ka vo gala ki phuta ho jaise dhol
ghar ki halal-khori talak karti hai thithol
haibat tamam us ki uthati hai muflisi
bete ka biyah ho to na byahi na sathi hai
ne raushni na baaje ki avaz aati hai
maan pichhe ek maili chadar odhe jaati hai
beta bana hai dulha to baava barati hai
muflis ki ye barat chadhati hai muflisi
gar byaah kar chala hai sahar ko to ye bala
shahdar naana hijda aur bhaat mundchada
khinche hue use chale jaate hain ja-ba-ja
vo aage aage ladta hua jaata hai chala
aur pichhe tapdiyon ko bajati hai muflisi
darvaze par zanane bajate hain taliyan
aur ghar men baithi domni deti hain galiyan
malan gale ki haar ho daudi le daliyan
saqqa khada sunata hai baten razaliyan
ye khvari ye kharabi dikhati hai muflisi
koi shuum be-haya koi bola nikhattu hai
beti ne jaana baap to mera nikhattu hai
bete pukarte hain ki baaba nikhattu hai
biibi ye dil main kahti hai achchha nikhattu hai
akhir nikhattu naam dharati hai muflisi
muflis ka dard dil men koi thanta nahin
muflis ki baat ko bhi koi manta nahin
zaat aur hasab-nasab ko koi janta nahin
surat bhi us ki phir koi pahchanta nahin
yaan tak nazar se us ko girati hai muflisi
jis vaqt muflisi se ye aa kar hua tabah
phir koi is ke haal pa karta nahin nigah
dalidari kahe koi thahra de ru-siyah
jo baten umr bhar na suni hoven us ne aah
vo baten us ko aa ke sunati hain muflisi
chulha tavana paani ke matke men aabi hai
piine ko kuchh na khane ko aur ne rakabi hai
muflis ke saath sab ke taiin be-hijabi hai
muflis ki joru sach hai ki yaan sab ki bhabi hai
izzat sab us ke dil ki ganvati hai muflisi
kaisa hi aadmi ho par iflas ke tufail
koi gadha kahe use thahra de koi bail
kapde phate tamam badhe baal phail phail
munh khushk daant zard badan par jama hai mail
sab shakl qaidiyon ki banati hai muflisi
har aan doston ki mohabbat ghatati hai
jo ashna hain un ki to ulfat ghatati hai
apne ki mehr ghair ki chahat ghatati hai
sharm-o-haya o izzat-o-hurmat ghatati hai
haan nakhun aur baal badhati hai muflisi
jab muflisi hui to sharafat kahan rahi
vo qadr zaat ki vo najabat kahan rahi
kapde phate to logon men izzat kahan rahi
taazim aur tavazoa ki babat kahan rahi
majlis ki jutiyon pe bithati hai muflisi
muflis kisi ka ladka jo le pyaar se utha
baap us ka dekhe haath ka aur paanv ka kada
kahta hai koi juuti na leve kahin chura
nat-khat uchakka chor daghabaz gath-kata
sau sau tarah ke aib lagati hai muflisi
rakhti nahin kisi ki ye ghairat ki aan ko
sab khaak men milati hai hurmat ki shaan ko
sau mehnaton men us ki khapati hai jaan ko
chori pe aa ke daale hi muflis ke dhyan ko
akhir nadan bhiik mangati hai muflisi
duniya men le ke shaah se ai yaar ta-faqir
khaliq na muflisi men kisi ko kare asiir
ashraf ko banati hai ik aan men faqir
kya kya main muflisi ki kharabi kahun ‘nazir’
vo jaane jis ke dil ko jalati hai muflisi
Leave a Reply