Aadhi Raat

1

siyah ped hain ab aap apni parchhain

zamin se ta-mah-o-anjum sukut ke minar

jidhar nigah karen ik athah gum-shudgi

ik ek kar ke fasurda charaghon ki palken

jhapak gaiin jo khuli hain jhapakne vaali hain

jhalak raha hai pada chandni ke darpan men

rasile kaif bhare manzaron ka jagta khvab

falak pe taron ko pahli jamahiyan aaiin

2

tamoliyon ki dokanen kahin kahin hain khuli

kuchh unghti hui badhti hain shah-rahon par

savariyon ke bade ghungruon ki jhankaren

khada hai os men chup-chap har singar ka ped

dulhan ho jaise haya ki sugandh se bojhal

ye mauj-e-nur ye bharpur ye khili hui raat

ki jaise khilta chala jaae ik safed kanval

sipah-e-rus hai ab kitni duur berlin se

jaga raha hai koi aadhi raat ka jaadu

chhalak rahi hai khum-e-ghaib se sharab-e-vajud

faza-e-nim-shabi nargis-e-khumar-alud

kanval ki chutkiyon men band hai nadi ka suhag

3

ye ras ka sej ye sukumar ye sukomal gaat

nayan kamal ki jhapak kam-rup ka jaadu

ye rasmasai palak ki ghani ghani parchhain

falak pe bikhre hue chand aur sitaron ki

chamakti ungliyon se chhid ke saaz fitrat ke

tarane jagne vaale hain tum bhi jaag utho

4

shua-e-mahr ne yuun un ko chuum chuum liya

nadi ke biich kumudni ke phuul khil utthe

na muflisi ho to kitni hasin hai duniya

ye jhaen jhaen si rah rah ke ek jhingur ki

hina ki tattiyon men narm sarsarahat si

faza ke siine men khamosh sansanahat si

ye kaenat ab ik niind le chuki hogi

5

ye mahv-e-khvab hain rangin machhliyan tah-e-ab

ki hauz-e-sehn men ab in ki chashmaken bhi nahin

ye sar-nigun hain sar-e-shakh phuul gudhal ke

ki jaise be-bujhe angare thande pad jaaen

ye chandni hai ki umDa hua hai ras-sagar

ik aadmi hai ki itna dukhi hai duniya men

6

qarib chand ke manDla rahi hai ik chidiya

bhanvar men nuur ke karvat se jaise naav chale

ki jaise sina-e-shair men koi khvab pale

vo khvab sanche men jis ke nai hayat Dhale

vo khvab jis se purana nizam-e-gham badle

kahan se aati hai madmalti lata ki lipat

ki jaise saikdon pariyan gulabiyan chhidkaen

ki jaise saikdon ban-deviyon ne jhule par

ada-e-khas se ik saath baal khol diye

lage hain kaan sitaron ke jis ki aahat par

is inqalab ki koi khabar nahin aati

dil-e-nujum dhadakte hain kaan bajte hain

7

ye saans leti hui kaenat ye shab-e-mah

ye pur-sukun ye pur-asrar ye udaas saman

ye narm narm havaon ke nil-gun jhonke

faza ki ot men mardon ki gungunahat hai

ye raat maut ki be-rang muskurahat hai

dhuan dhuan se manazir tamam nam-dida

khunuk dhundalke ki ankhen bhi niim khvabida

sitare hain ki jahan par hai ansuon ka kafan

hayat parda-e-shab men badalti hai pahlu

kuchh aur jaag utha aadhi raat ka jaadu

zamana kitna ladai ko rah gaya hoga

mire khayal men ab ek baj raha hoga

8

gulon ne chadar-e-shabnam men munh lapet liya

labon pe so gai kaliyon ki muskurahat bhi

zara bhi sumbul-e-turki laten nahin hiltin

sukut-e-nim-shabi ki haden nahin miltin

ab inqalab men shayad ziyada der nahin

guzar rahe hain kai karvan dhundalke men

sukut-e-nim-shabi hai unhin ke paanv ki chaap

kuchh aur jaag utha aadhi raat ka jaadu

9

nai zamin naya asman nai duniya

nae sitare nai gardishen nae din raat

zamin se ta-ba-falak intizar ka aalam

faza-e-zard men dhundle ghubar ka aalam

hayat maut-numa intishar ka aalam

hai mauj-e-dud ki dhundli faza ki nabzen hain

tamam khastagi-o-mandgi ye daur-e-hayat

thake thake se ye taare thaki thaki si ye raat

ye sard sard ye be-jan phiki phiki chamak

nizam-e-saniya ki maut ka pasina hai

khud apne aap men ye kaenat Duub gai

khud apni kokh se phir jagmaga ke ubhregi

badal ke kechuli jis tarah naag lahrae

10

khunuk fazaon men raqsan hain chand ki kirnen

ki abginon pe padti hai narm narm phuvar

ye mauj-e-ghaflat-e-maasum ye khumar-e-badan

ye saans niind men Duubi ye aankh madmati

ab aao mere kaleje se lag ke so jaao

ye palken band karo aur mujh men kho jaao

Leave a Comment