Tere Jaur-O-Jafa Ka Hum Kabhi Shikwa Nahin Karte

tire jaur-o-jafa ka ham kabhi shikva nahin karte

mohabbat jis se karte hain use rusva nahin karte

hamare sheva-e-taslim ki bhi qadr kar tu kuchh

ki fariyad-o-fughan ah-o-buka naala nahin karte

mohabbat men bhi ham me.aar ka kuchh paas rakhte hain

kisi halat men bhi ḳhuddari ka sauda nahin karte

mohabbat karne valon ka alag ik apna maz.hab hai

vo rah-e-ishq men sud-o-ziyan dekha nahin karte

raqibon ko sar-e-mahfil jo baazu men biThate hain

dil-azari miri karte hain aap achchha nahin karte

hai poshida yahan bhi apni izzat hi ka ik pahlu

kisi se bad-suluki ka tiri charcha nahin karte

gavara ehtiyat aisi mohabbat men hai ‘ḳhushtar’ ko

ki us ke naam se mansub sher apna nahin karte