Ashk Mizhgan-E-Tar Ki Punji Hai

Insha Allah Khan Insha

ashk mizhgan-e-tar ki punji hai

ye samar us shajar ki punji hai

aah ko mat haqir jaan yahi

dudman-e-asar ki punji hai

jo ghadi yaad men tiri kat jaae

vo hi athon pahar ki punji hai

jalva-e-yar hai aziiz bahut

yahi ahl-e-nazar ki punji hai

jald achchha ho ye taalallah

yahi ‘insha’ ke ghar ki punji hai

teri bakhshi hui khudavanda

meri ye umr bhar ke punji hai

main tire sadqe bas yahi mere

dil-o-jan-o-jigar ki punji hai