mire suḳhan ko vo e.ajaz de ḳhuda-e-suḳhan
ki harf harf bane ganj-e-be-bahae-suḳhan
sukut toḌe kabhi tu bhi dil ki baat kahe
ḳhuda kare kabhi tere bhi lab pe aa.e suḳhan
ghazab ḳhuda ka kaḌi dhuup ka tavil safar
aur us safar ka asasa bas ik rida-e-suḳhan
hadis-e-gham ka bayan hai baghair-e-jumbish-e-lab
hai ḳhamushi bhi miri ain mudda.a-e-suḳhan
badan se lipTi rahi taar taar ho kar bhi
hamen aziiz bhala kyuun na ho qaba-e-suḳhan
hikayat-e-gham-e-dil kah ke siine paḌ ga.e lab
hamen ye chup bhi lagi hai to bar-bina-e-suḳhan
nibhe to kaise nibhe ab ye sochna hai ‘vaqar’
ki vo suḳhan se gurezan hai main fida-e-suḳhan
Leave a Reply