Meena Naqvi
vo hai apna ye jatana bhi nahin chahte ham
dil ko ab aur dukhana bhi nahin chahte ham
aarzu hai ki vo har baat ko ḳhud hi samjhe
dil men kya kya hai dikhana bhi nahin chahte ham
ek parde ne bana rakkha hai donon ka bharam
aur vo parda haTana bhi nahin chahte ham
tohmaten ham pe lagi rahti hain lekin phir bhi
asman sar pe girana bhi nahin chahte ham
ḳhud-numa.i hamen manzur nahin hai hargiz
aise qad apna baḌhana bhi nahin chahte ham
das se milna hai use ek hain un men ham bhi
is tarah us ko bulana bhi nahin chahte ham
ham se milne ki taḌap jab nahin us ko ‘mina’
haath phir us se milana bhi nahin chahte ham
Leave a Reply