chutkiyan li hi ki uth baith jo mar jaae koi
ai sitamgar tire hathon se kidhar jaae koi
kyuun ki guzregi na guzroge jo tum yaar idhar
pas ye marzi hai ki bas jaise guzar jaae koi
mire marne se tira shohra hua ya qismat
ki bigad jaae koi aur sanvar jaae koi
ek dam ka bhi bharosa nahin manind-e-hayat
bahr-e-hasti men habab aa ke ubhar jaae koi
shama saan sar na kate us ka ye imkan nahin
bazm-e-khuban men jo ba-dida-e-tar jaae koi
dil mira tum ne churaya mujhe ulti hai ye fikr
na khabar paae koi ta na biphar jaae koi
aap ke ahd men ye rasm hai dekhi ham ne
ki gunahgar koi aur ho dar jaae koi
ghar se niklo ki hamen ghar ki na kuchh yaad rahe
ghar men baithe hue kahti ho na ghar jaae koi
yuun to samjhe sune aati nahin ‘ehsa۔n’ ko samajh
kya tamasha ho ki dil le ke mukar jaae koi
Leave a Reply