huruf ḳhali sadaf aur nisab zaḳhmon ke
varaq varaq pe hain tahrir ḳhvab zaḳhmon ke
saval phuul se nazuk javab zaḳhmon ke
bahut ajiib hain ye inqalab zaḳhmon ke
gharib-e-shahr ko kuchh aur gham-zada karne
amir-e-shahr ne bheje ḳhitab zaḳhmon ke
suron pe taan ke rakhna savab ki chadar
utarne vaale hain ab ke azaab zaḳhmon ke
vo ek shaḳhs ki jo fat.h ka samundar tha
usi ke hisse men aa.e sarab zaḳhmon ke
khilenge naḳhl-e-tamanna ki Tahni Tahni par
lahu ki surḳhiyan le kar gulab zaḳhmon ke
saja ke rakkhunga mehrab-e-dil men ai ‘nayyar’
bahut aziiz hain mujh ko gulab zaḳhmon ke
Leave a Reply