agar charagh bhi andhi se Dar ga.e hote
to sochiye ki ujale kidhar ga.e hote
ye mere dost mire chara-gar mire ahbab
na chheḌte to mire zaḳhm bhar ga.e hote
koi nigah jo apni bhi muntazir hoti
to ham bhi shaam Dhale apne ghar ga.e hote
agar vo meri ayadat ko aa gaya hota
to doston ke bhi chehre utar ga.e hote
hamen to shauq-e-suḳhan ne sameT rakkha hai
vagarna ham to kabhi ke bikhar ga.e hote
unhen bhi mujh se mohabbat to hai ‘nafas’ lekin
main puchhta to yaqinan mukar ga.e hote
Leave a Reply