shikasta saz-e-mohabbat ki ik sada huun main
jo rah ga.i hai laraz kar vo iltija huun main
dam-e-nazara ye divangi-e-zauq-e-nigah
vo mujh ko DhunDte hain un ko DhunDhta huun main
jahan ye kufr hai taqdir ka gila karna
ab is maqam pe apne ko pa raha huun main
salam ai nigah-e-be-niyaz-e-garmi-e-ishq
ḳhata muaaf ki ab sard ho raha huun main
mira hi zarf hai is mai-kada men ai saaqi
ki jam-e-talḳh bhi hans hans ke pi raha huun main
miri talash men rahti hai ḳhud miri manzil
ghalat ḳhayal ki manzil ko DhunDhta huun main
vahin se paa.i hai manzil ki raah ai ‘asi’
jahan pe us ki mohabbat men kho gaya huun main
Leave a Reply