dil laga.enge ham us shoḳh pari-zad se ab
badle sab levenge charḳh-e-sitam-ijad se ab
tang ushshaq hain zalim tiri bedad se ab
un ke kanpe hai falak nala-o-fariyad se ab
barq-o-simab ko da.ave the taḌapne ke baḌe
hon muqabil kaho aa kar dil-e-betab se ab
toḌ de jab kamar-e-shaḳh samar hi us ka
kya tavaqqo.a rakhe apni koi aulad se ab
phans chuki daam men sayyad ke jab bulbul-e-zar
rona kya fa.eda be-rahmi-e-sayyad se ab
dil liya jaan bhi maujud hai lo bismillah
mujh ko chara nahin hai aap ke irshad se ab
‘aish’ asudgi darain ki ho tujh ko nasib
hai dua ye hi miri ḳhaliq-e-javvad se ab
Leave a Reply