Rakhshan Hashmi
meri gardan par na jaane kis ka chehra rah gaya
aa.ine ko main mujhe a.ina takta rah gaya
saara din bikhre hue ḳhvabon ko yakja kijiye
zindagi ke naam par bas ik tamasha rah gaya
bhar rahi hai siskiyan kis ke liye nahr-e-furat
ai zamin-e-karbala ye kaun pyasa rah gaya
apne ghar ko phunk den aur raushni paida karen
ab hamare samne bas ek rasta rah gaya
ek din fursat men baiThungi laga.ungi hisab
main ne kya kuchh kho diya aur paas men kya rah gaya
us ne to ik baar ‘raḳhshan’ mujh ko dekha tak nahin
mez ke kone men rakkha mera tohfa rah gaya
Leave a Reply