main tanha hijr ke jangal ke gharon men
jalati huun
sukhan ke vo diye jin ko
abhi bahar ki zahrili havaen ajnabi mahsus karti hain
abhi ye raushni jo sach ki khushbu ki hifazat ke liye
tarikiyon se lad rahi hai, na-shanasi ke
ghubar-alud raston se guzarti hai
abhi jugnu shabon men apne hone ki gavahi tak nahin dete
abhi to titliyan maile paron se dar-ba-dar phirti hain be-chari
abhi to chand bhi thandak nahin deta mohabbat ki
abhi to raat ke shanon pe hain halat ki zulfen
mujhe maalum hai main janti huun mujh ko rahna hai
isi ghar-e-aziyyat men
magar sun lo
yahin se mere honton ko mila hai vasf-e-goyai
yahin se mere honton ko mila hai vasf-e-goyai
yahin se main ne sach ki raushni khud men utari hai
isi ghar-e-aziyyat ne mire lafzon ko avazen ata ki hain
yahin se ek din suraj nikalna hai vafaon ka
yahin se ek din harf-e-mohabbat bhi janam lega
mire lafzon men maani ka asar mahsus karte ho
miri avaz sunte ho
Leave a Reply