jo ku-e-dost ko jaun to pasban ke liye
nahin hai khvab se behtar kuchh armughan ke liye
tamam illat-e-darmandagi hai qillat-e-shauq
tapish hui par-e-parvaz-e-murgh-e-jan ke liye
sharik-e-bulbul-o-qumri hain vo zabun-fitrat
jo be-qarar rahe sair-e-gulistan ke liye
umiid hai ki nibahenge imtihan le kar
jo is qadar mutaqazi hain imtihan ke liye
na khakiyon se taalluq na qudsiyon se rabt
na ham zamin ke liye hain na asman ke liye
payam-e-dost hua qasidon ko vajh-e-sharaf
nasim-e-misr se izzat hai karvan ke liye
qafas zamana o jaan murgh o ashiyan malakut
qafas men murgh hai betab ashiyan ke liye
fasane yuun mohabbat ke sach hain par kuchh kuchh
badha bhi dete hain ham zeb-e-dastan ke liye
hamari nazm men hai ‘shefta’ vo kaifiyyat
ki kuchh rahi na haqiqat mai-e-mughan ke liye
Leave a Reply