Akhtar Hoshiyarpuri
dil men ik jazba-e-bedad-o-jafa hi hoga
vo ḳhuda-vand bhi hoga to ḳhuda hi hoga
gard si uḌti nazar aati hai andhi hogi
duur tak naqsh-e-qadam hain koi raahi hoga
ham se jo puchhna hai puchh lo varna kal tak
kis ko andaza-e-na-karda-gunahi hoga
kahin girti hui divaren kahin jhukti chhaten
aap kahte hain to ye qasr-e-vafa hi hoga
phuul se taraste hue log ḳharabon men kahan
dasht-e-vahshat men koi abla-pa hi hoga
jaate jaate mire darvaze ke paT khol gai
ye bhi ‘aḳhtar’ koi andaz-e-saba hi hoga
Leave a Reply