jo aa.e vo hisab-e-ab-o-dana karne vaale the
ga.e vo log jo kar-e-zamana karne vaale the
uḌane ke liye kuchh kam nahin hai ḳhaak ghar men bhi
vo mausam hi nahin hain jo divana karne vaale the
miri gum-gashtagi mere liye chhat ban ga.i varna
ye duniya vaale mujh ko be-Thikana karne vaale the
na dete saare manzar aks hi thoḌe se de dete
ham avara kahan taz.in-e-ḳhana karne vaale the
samundar le gaya ham se vo saari sipiyan vapas
jinhen ham jamma kar ke ik ḳhazana karne vaale the
‘zafar’ be-ḳhanaman apne ko ḳhud hi kar liya tum ne
ye kar-e-ḳhair to ahl-e-zamana karne vaale the
Leave a Reply