Hangame Se Wahshat Hoti Hai Tanhai Mein Ji Ghabrae Hai

Rifat Sarosh

hangame se vahshat hoti hai tanha.i men ji ghabra.e hai

kya janiye kya kuchh hota hai jab yaad kisi ki aa.e hai

jin kuchon men sukh-chain gaya jin galiyon men badnam hue

divana dil un galiyon men rah rah kar Thokar khaa.e hai

savan ki andheri raton men kis shoḳh ki yadon ka anchal

bijli ki tarah lahra.e hai badal ki tarah uḌ jaa.e hai

yadon ke darpan TuuT ga.e nazron men koi surat hi nahin

lekin be-chehra maazi saaya saaya lahra.e hai

kuchh duniya bhi bezar hai ab ham jaise vahshat valon se

kuchh apna dil bhi duniya ki is mahfil men ghabra.e hai

kaliyon ki qaba.en chaak huiin phulon ke chehre zaḳhmi hain

ab ke ye baharon ka mausam kya rang naya dikhla.e hai

divar na dar sunsan khanDar aisa ujḌa ye dil ka nagar

tanha.i ke virane men avaz bhi Thokar khaa.e hai

ye mera koi dam-saz na ho ‘rif.at’ ye koi hamraz na ho

jo mere giit miri ghazlen meri hi dhun men gaa.e hai