Ali Ahmad Jalili
tum jo aaoge to mausam dusra ho ja.ega
lu ka jhonka bhi chalega to saba ho ja.ega
zindagi men qatl kar ke tujh ko nikla tha magar
kya ḳhabar thi phir tira hi samna ho ja.ega
nafraton ne har taraf se gher rakkha hai hamen
jab ye divaren girengi rasta ho ja.ega
andhiyon ka kaam chalna hai gharaz is se nahin
peḌ par patta rahega ya juda ho ja.ega
kya ḳhabar thi ai amir-e-shahr tere daur men
saans lena jurm jiina hadsa ho ja.ega
aap paida to karen dast-e-hunar phir dekhiye
aap ke hathon men patthar a.ina ho ja.ega
mere honTon pe hansi aa kar rahegi ai ‘ali’
ek din ye vaqi.a bhi dekhna ho ja.ega
Leave a Reply