Main Dar Raha Hun Har Ek Imtihan Se Pahle

main Dar raha huun har ik imtihan se pahle

mire paron ko hua kya udaan se pahle

mire nasib men raston ki dhuul likkhi thi

na mil saki mujhe manzil takan se pahle

ye kaun shakhs tha chalak kis qadar nikla

ki baat chhed gaya darmiyan se pahle

main us ke dard ka darman to janta tha magar

vo kuchh to bolta apni zaban se pahle

tum us ke ghar ki taraf chal pade to ho lekin

koi padav nahin asman se pahle

khada huun aaj main ‘anjum’ yaqin ki sarhad par

ajiib karb men gum tha guman se pahle

Leave a Comment