Anwar Shadani
ho jaate hain jab aap bhi hairan dekh kar
hansta huun apna chaak gareban dekh kar
phulon ka rang-o-rup nikharta chala gaya
nazuk labon pe aap ke muskan dekh kar
ik bevafa ka pyaar mujhe yaad aa gaya
daur-e-ḳhizan men baagh ko viran dekh kar
chalte hain jab vo naaz se kahti hai yuun bahar
ai dilruba sambhal ke miri jaan dekh kar
ahl-e-vafa ko apni vafaon pe naaz hai
jaur-o-sitam pe un ko pasheman dekh kar
kuchh to ḳhuda ke vaste batlao kya hua
bechain huun main tum ko pareshan dekh kar
anvar janab-e-shaiḳh ki niyyat badal ga.i
bazar men sharab ki dukan dekh kar
Leave a Reply