poet

Ishq Ka Ikhtitam Karte Hain

ishq ka ikhtitam karte hain

dil ka qissa tamam karte hain

qahr hai qatl-e-am karte hain

tark turki tamam karte hain

taq-e-abru se un ke dar-guzre

ham yahin se salam karte hain

shaikh us se panah mangte hain

barahman raam raam karte hain

jauhari par tire dur-e-dandan

ab-o-dana haram karte hain

khatt-e-qismat padha nahin jaata

sirf mantiq tamam karte hain

ya ilahi halal hon vaaiz

dukht-e-raz haram karte hain

aap ki munh lagi hai dukhtar-e-raz

baten honton se jaam karte hain

chali duniya se ham pa-e-uqba

kuuch bhar maqam karte hain

apne dil par hai ikhtiyar hamen

mulk ka intizam karte hain

qabil-e-guftugu raqib nahin

aap kis se kalam karte hain

raat bhar mere nala-e-pur-dard

niind un ki haram karte hain

zulm hi ahmaqon ki munh-zori

tang ye be-lagam karte hain

dil se rang-e-dui mitate hain

zakhm ka iltiyam karte hain

ai ‘saba’ kyuun kisi ka dil toden

kaabe ka ehtiram karte hain

More Poems

Leave a Comment