Wo Gham Jo Hasil-E-Hasti Hai Mil Chuka Ki Nahin

Poet

vo gham jo hasil-e-hasti hai mil chuka ki nahin

phir aur kaun sa hai lutf dil-kusha ki nahin

mizaj-e-dard-e-tamanna badal gaya ki nahin

vafa ne ranj ko rahat bana liya ki nahin

jo dil men toḌti rahti thi neshtar har dam

hui vo kavish-e-jan ka vo jan-faza ki nahin

jala diya tha lahu jis ne dil ki rag rag ka

vo soz-e-atish-e-gham raas aa gaya ki nahin

nazar nazar pe hai paiham tajalliyon ka nuzul

talash-e-husn ka haq ho gaya ada ki nahin

zahe surur ḳhalish ye ḳhabar nahin dil ko

jo chubh gaya tha vo kanTa nikal gaya ki nahin

karishma apni tavajjoh ka tum ne dekh liya

Thahar ga.i miri umr-e-gurez-pa ki nahin

zara batao agar tum ne sab ki baat suni

mire sukut ne bhi tum se kuchh kaha ki nahin

kahan ye hosh nashat-e-talab men ai ‘kaukab’

na-gufta harf-e-talab sun liya gaya ki nahin