jo meri aah se nikla dhuan hai meri miTTi ka
mire andar nihan atish-fishan hai meri miTTi ka
diye hain taaq par raushan magar zau mere andar hai
jo kuchh kuchh tirgi hai vo saman hai meri miTTi ka
mire jalvon ki pamali na dekhi ja.egi mujh se
hunar kuchh is tarah se ra.egan hai meri miTTi ka
zarur us ki shabahat meri sochon se alag hogi
tasavvur men jo dekha hai guman hai meri miTTi ka
samundar aur dariya hain purane ashna mere
barasta hai jo paani mehrban hai meri miTTi ka
mire ash.ar men afaq-o-anfus ki kahani hai
mira har lafz-e-shirin tarjuman hai meri miTTi ka
‘ovaisi’ qalb-o-jan karte rahe sher-o-adab ko ham
agarche ye bhi jins-e-ra.egan hai meri miTTi ka
Leave a Reply