kaisi mahfil men ai dil tujh ko laaya huun dekh zara
main ne tere aish kara.e ab tu mere aish kara
lagta hai ye naseh bhi hai jin ki tarah ki koi chiiz
yak dam aa dhamkega kahin se junhi main ne jaam bhara
gaaḌi ki raftar bhi tez hai rasta bhi hai na-hamvar
dhire dhire shant hua huun pahle to main bahut Dara
apni maharat par tujh ko beja to na hoga itna maan
main bhi maan hi lunga tujh ko lekin khel ke mujhe hara
apne hal-e-zabun ka main taqdir pe dharta tha ilzam
ab malum hua ‘basir’ ye sab hai tera kiya-dhara
Leave a Reply