Ishq Ki Rah Mein Jo Dar-O-Rasan Hai Kyun Hai

Nirmal Nadeem

ishq ki raah men jo dar-o-rasan hai kyuun hai

sar kaTane ki har ik dil men lagan hai kyuun hai

jis ki ḳhushbu se mo.attar hain vafa ki rahen

mere siine men vo zaḳhmon ka chaman hai kyuun hai

jis men likkhi hai tavariḳh ka.i sadiyon ki

vaqt ke sar pe paḌi aisi shikan hai kyuun hai

kya use ishq se mahrum rakha qudrat ne

shams ke siine men jo itni jalan hai kyuun hai

mujh pe bandish ye ki us par main ghazal bhi na kahun

gul-badan hai vo agar ghuncha-dahan hai kyuun hai

mujh se puchho na sabab main na bata pa.unga

us se milne ka agar mera ye man hai kyuun hai

us ko ma.alum hain duniya ki misalen lekin

ishq ke sahra men jo dil ka hiran hai kyuun hai

kitna maghrur tha vus.at pe jo apni lekin

mere ik naqsh-e-qadam par vo gagan hai kyuun hai

jis ke paḌne se ‘nadim’ apna badan khil jaa.e

ishq ki lau men bhala aisi kiran hai kyuun hai