us but ne gulabi jo uTha munh se laga.i
shishe men ajab aan se jhamke thi ḳhuda.i
aalam men nashe ke shab-e-mahtab ne tere
ḳhurshid se mukhḌe ne tilismat dikha.i
go ghair se milne ki qasam khate ho pyare
chhupti nahin vo baat jo ho dil se bana.i
vallah hamen ishq ki sab bhuul hui chaal
kafir tiri raftar ne phir yaad dila.i
har dam to bhara shisha jhukata hai nashe men
Darta huun ki teri na muḌak jaa.e kala.i
a.ina numu-posh hua ishq men tere
chaar abaruon ki le ke faqirana safa.i
ham jhuuT kahen to na ho didar ḳhuda ka
hai roz-e-qayamat tiri ik shab ki juda.i
ashiq ko ‘muhib’ saltanat-e-har-do-jahan hai
gar yaar ke kuche ki mayassar ho gada.i
Leave a Reply