raat ke andhere men
aaj phir dabe paanv
sarsarati sargoshi
phan utha ke chalti hai
vaqt ret ki manind
haath se phisalta hai
niind mujh se ruthi hai
bhuuk raqs karti hai
pyaas chubhne lagti hai
saans kyuun atakti hai
jhanko meri ankhon men
aks dekh lo apna
aur mujhe ye batla do
kya tumhen khatakta hai
kyuun gurezan ho mujh se
kya men bojh lagti huun
kyuun machal si jaati ho
haath bhi badhati ho
phir pare khisakti ho
haath khol do mere
bhinch lo na siine men
gaal chhune do apne
gar nahin rahi kal main
lams to rahega na
ye sadaen kaisi hain
jin ki guunj se mere
kaan sansanate hain
kis ki siskiyan hain ye
zindagi ki ya tum ho
maut to nahin na ye
maut gar nahin hai ye
ahaten hain phir kis ki
kyuun ghutan ka pahra hai
kya mujhe janam de kar
tum ne maut banti hai