Ab Shauq Se Ki Jaan Se Guzar Jaana Chahiye

ab shauq se ki jaan se guzar jaana chahiye

bol ai hava-e-shahr kidhar jaana chahiye

kab tak isi ko akhiri manzil kahenge ham

ku-e-murad se bhi udhar jaana chahiye

vo vaqt aa gaya hai ki sahil ko chhod kar

gahre samundaron men utar jaana chahiye

ab raftagan ki baat nahin karvan ki hai

jis samt bhi ho gard-e-safar jaana chahiye

kuchh to subut-e-khun-e-tamanna kahin mile

hai dil tahi to aankh ko bhar jaana chahiye

ya apni khvahishon ko muqaddas na jante

ya khvahishon ke saath hi mar jaana chahiye

Leave a Comment