na intizar men yaan aankh ek aan lagi
na haae haae men taalu se shab zaban lagi
jala jigar tap-e-gham se phadakne jaan lagi
ilahi khair ki ab aag paas aan lagi
gali men us ki na phir aate ham to kya karte
tabiat apni na jannat ke darmiyan lagi
jafa-e-ghair ka shikva tha tera tha kya zikr
abas ye baat buri tujh ko bad-guman lagi
hanso na tum to mire haal par main huun vo zalil
ki jis ki zillat-o-khvari se tum ko shaan lagi
kahan vo ah-o-fughan dam bhi le nahin sakte
hamen ye teri dua-e-bad asman lagi
main aur us ko bulaunga roz-e-vasl men lo
ajal bhi karne mohabbat ka imtihan lagi
ba-rang-e-surat-e-bulbul nahin nava-sanji
ye kya hua ki chup ai gulsitan bayan lagi
sada tumhari taraf ji laga hi rahta hai
tumhare vaste hai dil ko mehrban lagi
vo kina-tuz tha ‘momin’ to dil lagaya kyuun
kaho to kya tumhen aisi bhali vo aan lagi
Leave a Reply