Sajida Zaidi
charagh-e-did jalao ki khvab larzan hain
dhuen se shoala jagao ki khvab larzan hain
koi ghazal koi naghma koi bahar ka giit
faza-e-gham ko sunao ki khvab larzan hain
hayat jabr-e-musalsal sahi magar us vaqt
rabab-o-saz uthao ki khvab larzan hain
ba-nam-e-tishnagi laao koi dahakta ayagh
ye sard raat jalao ki khvab larzan hain
karam ka mehr-o-mohabbat ka zikr kya ab to
sitam ke naaz uthao ki khvab larzan hain
ufuq pe ziist ke hangam-e-arzu-e-visal
ka mahtab sajao ki khvab larzan hain
ye pul-sirat-e-tamanna ki sakht rahen hain
qadam sambhal ke uthao ki khvab larzan hain
Leave a Reply