shad-azimabadi

Siyahkar Siyah-Ru Khata-Shiar Aaya

siyahkar siyah-ru khata-shiar aaya

tiri janab men tera gunahgar aaya

khizan ka daur gaya mausam-e-bahar aaya

magar na is dil-e-be-sabr ko qarar aaya

kahin javab na tu ne diya yahan ke siva

jahan men yuun to bahut main tujhe pukar aaya

sara-e-dahr men chhoda tan-e-kasif apna

ye bojh sar se musafir tira utaar aaya

hamare nala-e-dil ka na puchhiye ahval

gali se yaar ki himmat bhi ab ke haar aaya

padi jo qais ke uupar nazar bayaban men

mujhe gharib ke uupar ghazab ka pyaar aaya

na apne paanv se aana mila gali men tiri

yahan bhi chaar ke kandhon pe main savar aaya

ye iztirab hai kyuun hai kidhar ka qasd ai ruuh

kahan se aai talab kis jagah se taar aaya

bura khizan ka ho dekhe jo sukhe sukhe hont

gharib phuul pe mujh ko ghazab ka pyaar aaya

miri na puchh ki teri gali men khaak huun main

tujhi ko meri vafa ka na e’tibar aaya

lahad ne khol ke aghosh di jagah jo mujhe

lipat ke rah gae ham ko bhi khuub pyaar aaya

yaqin jaan le saaqi ki khum ki khair nahin

khuda na karda jo ab ke mujhe khumar aaya

mire nasib kahan is tarah ke dida-e-tar

sunun ye khush-khabari kaan se ki yaar aaya

nigah ne un ki jahan said-e-nau ko taak liya

ada ne un ki kaha le naya shikar aaya

tire firaq ke khugar na mar mite jab tak

qaza ke aane ka tab tak na e’tibar aaya

dila palat gaya qismat ka pahle hi paasa

ab apni jiit kahan dil jab apna haar aaya

jab ikhtiyar chaman par nahin to ham ko kya

hazar baar agar mausam-e-bahar aaya

shikayat-e-dil-e-muztar kahan talak ai maut

duaen dunga tujhe gar ise qarar aaya

javab-e-khat ka na qasid se majra puchho

hai saaf chehre se zahir ki sharmsar aaya

nazar men phir gai chaal aap ki javani ki

jo ladkhadata hua koi bada-khvar aaya

jo mangte to hamen baghban se kya milta

gharib phuul to daman ko bhi pasar aaya

na apne nala-e-dil ko mila javab kahin

nikal ke dil se tujhe arsh tak pukar aaya

adam men ‘shad’ ko kya valvala ho jannat ka

ki ye gharib to hasti se dil ko maar aaya

More Poems

Leave a Comment