Imdad Imam Asar
husn ki jins ḳharidar liye phirti hai
saath bazar ka bazar liye phirti hai
dar-ba-dar hasrat-e-dildar liye phirti hai
sar-e-har-kucha-o-bazar liye phirti hai
adam-abad men aane ka sabab hai zahir
justuju-e-kamar-e-yar liye phirti hai
dil-e-sozan se nahin koi nishan-e-zulmat
mash.al-e-ah-e-shab-e-tar liye phirti hai
aate hi fasl-e-ḳhizan bulbul-e-shaida bahki
har taraf gul ki jagah ḳhaar liye phirti hai
dair o masjid men tamann-e-ziyarat kis ki
tum ko ai kafir o din-dar liye phirti hai
dasht men qais ko kya aa.e nazar jab laila
saath men gard ki divar liye phirti hai
daur-e-saghar men nahin kaf sar-e-bada saaqi
duḳht-e-raz shaiḳh ki dastar liye phirti hai
ḳhun-e-farhad se bechain hai ruh-e-shirin
be-sutun se bhi giran-bar liye phirti hai
gul se kyuun kah nahin deti hai payam-e-bulbul
apne sar bad-e-saba baar liye phirti hai
manta hi nahin laila ki kare kya laila
saath men qais ko na-char liye phirti hai
sadma pahuncha kisi gul ko ki chaman men bulbul
ḳhuun men Duubi hui minqar liye phirti hai
kushta-e-naz ki turbat na milegi bulbul
phuul minqar men be-kar liye phirti hai
ta.ir-e-dil ko hava-e-ḳham-e-zulf-e-sayyad
surat-e-murgh-e-giraftar liye phirti hai
jumbishe-e-pa se hai galiyon men qayamat barpa
saath mahshar tiri raftar liye phirti hai
kohkan ḳhud to subuk-dosh huaa, par shirin
sar pe ilzam ka kohsar liye phirti hai
dasht-e-ghurbat men nahin phirta huun ḳhud avara
gardish-e-charḳh-e-sitamgar liye phirti hai
saath duniya ka nahin talib-e-duniya dete
apne kutton ko ye murdar liye phirti hai
hasrat-e-did ‘asar’ hazrat-e-‘atish’ ki tarah
pesh-e-rauzan pas-e-divar liye phirti hai
Leave a Reply