dhuan-dhar taqrir jis ne abhi ki thi vo aadmi hai
jo lafzon ke pul bandhta hai
ubharte hue nau-javanon ko vaadon ki afyun de kar
usi pul pe laata hai aur gharq kar ke
palat jaata hai hasb-e-dastur aram-gah ko
ye duniya to un shola saman logon ne aapas men taqsim kar li
jo hathiyar ki shakl men ranj-o-gham dhalte hain
ya gola-barud ke kar-khanon ke malik hain
ya phir sana-khvan hain un ke
hamare liye sirf naare bache hain
sanati daur ke kaj-kulahon ki dad-o-dahish ruh-parvar ho ya jan-leva
magar zindabad, afrin, marhaba, ke siva kuchh nahin paas apne
ye sab janta hai hamari shujaat ki parvaz kya hai
hamari javan-mardi ik suba-jati taassub se
ya firqa-vari fasadat se aage kuchh bhi nahin hai
futuhat-e-askandari ham ne takhti pe likh kar mita di hain kab ki
hamare baad zamin ke tale so rahe hain
ajaib-gharon men latakti hain talvaren un ki
aur un ke zarrin libadon ko ghun kha gaya hai
zira-baktaron par clones aa gai hai
ye sab janta hai hamari tag-o-taz kya hai
hamare shikam gar hamare suron pe na hote
aur chehron men aza-e-jinsi
to ham achchhe insan bante
hamare gharon ke kam o besh sab aqabi darvaze paiham khule hain
hamare lahu men hare laal piile bahut saare parcham khule hain
kahin se magar haq ki avaz aati nahin hai
hamari zaban dil ki sathi nahin hai
hamare liye khokhla lafz-e-jamhuriyat hai, taqarir hain leaderon ki
hamare liye roz-namon ke safhat hain, ishtiharat hain nim-jinsi
hamare liye devtaon ke but hain, khuda ke faramin hain aur uqba
jo bad-rang hai haal ki tarah aur kore latthe ki bu se bhari hai
hamare liye sirf roti ki jidd-o-johd
auraton ke barhana badan ki tamanna se aage kahin kuchh nahin hai
hamari ragon men jo tezab hai us ki shiddat kabhi kam na hogi!
Leave a Reply