Shafaq Sopori
main huun ik kaghaz-e-qalam-bezar
bad-e-sarsar men barg-e-nam bezar
arabi log hain to hone do
vo ḳhuda to nahin ajam-bezar
dekh kar bol chehre-bushre se
nazar aata huun kya sitam-bezar
ai gurezan-e-abla-pa.i!
dasht-e-majnun hai qadam-bezar
ik dil-e-muztarib hai pahlu men
aur siina hai ek-dam bezar
rashk-e-shana se pech khata huun
main giraftar-e-zulf-e-ḳham bezar
mustarad daftar-e-tarab men hua
ek ummid-var-e-gham bezar
mujh se bezar kul jahan hai ‘shafaq’!
main bhi ḳhud se nahin huun kam bezar
Leave a Reply