jazba-e-ishq agar dil men na paida hota
main samajhta huun mire haq men ye achchha hota
is qadar shiddat-e-gham par to yahi lazim tha
dil na hota mira patthar ka kaleja hota
be-ḳhudi hai ki tiri bazm men le aa.i hai
hosh hota to yahan kis liye rusva hota
ik nazar dekh ke kuchh aur baḌha di vahshat
is se achchha to yahi tha ki na dekha hota
mujh ko manzur na thi apni hi shohrat varna
main to vo tha ki mira arsh pe charcha hota
ziist bhi maut bhi donon ke tumhin ho malik
munsifi ye thi ki haq ek pe mera hota
kuchh haqiqat na sahi husn-e-aqidat hi sahi
‘nur’ jiine ke liye kuchh to sahara hota
Leave a Reply