Andar to KHayalon Ke Ho Aae KHayal Apna

andar to ḳhayalon ke ho aa.e ḳhayal apna

ifsha-e-haqiqat se Darta hai saval apna

kaghaz ki sadaqat huun go vaqf-e-kitabat huun

safhon se ibarat huun khulna hai muhal apna

a.ina hai zaat apni ma.amur huun jalvon se

mastur hai nazron se har chand jamal apna

ḳhush hai ki jo TuuTi hai aḳhir koi shai hogi

ḳhud men nazar aata hai shishe ko jo baal apna

parde ne kaha mujh ko parde ne suna mujh ko

naghma huun samajhta huun itna hi kamal apna

ghunche men raha huun main tinke men Dhala huun main

kirnon ki dua huun main sho.ala hai ma.aal apna

ai ham-nazaro Thahro kya ho jo baramad ho

har gosha-e-ḳhalvat se ik naqsh-e-ḳhayal apna

tah sat.h tak aa pahunchi ik mauj na haath aa.i

kab tak ye muhim aḳhir ab khinch luun jaal apna

ḳhushbu se ‘muhib’ khelo kya uud ko rote ho

is ahd ki nazron se maḳhfi hai malal apna