ye roz-o-shab ki masafat ye aana jaana mira
bahut se shahron men bikhra hai ab-o-dana mira
nahin pasand mire tang-zehn qatil ko
ye harf-e-shukr ye ḳhanjar pe muskurana mira
ajiib radd-e-amal tha vo raushni ke ḳhilaf
jala jala ke charaghon ko ḳhud bujhana mira
ye chand log mire as-pas baiThe hue
yahi kama.i hai meri yahi ḳhazana mira
kahan utarun janaze ko zindagi tere
ki is ke bojh se shal ho chuka hai shana mira
zara si baat pe ghar chhoḌ kar chale aana
phir is ke ba.ad kabhi lauT kar na jaana mira
ye baat to miri zanjir-e-pa bhi janti hai
baḌe sharif gharanon men tha gharana mira
mizaj apna mila hi nahin zamane se
na main hua kabhi is ka na ye zamana mira
amir-e-shahr ko bhi qatl kar gaya ‘tariq’
faraz-e-dar pe aa ke ye muskurana mira
Leave a Reply