Khwabon Se Yun To Roz Bahalte Rahe Hain Hum

khvabon se yuun to roz bahalte rahe hain ham

kitni haqiqaton ko badalte rahe hain ham

apne ghubar men bhi hai vo zauq-e-sar-kashi

pamal hauke arsh pe chalte rahe hain ham

sau sau tarah se tujh ko sanvara hai husn-e-dost

sau sau tarah se rang badalte rahe hain ham

har dasht-o-dar men phuul khilane ke vaste

akasr to nok-e-khar pe chalte rahe hain ham

ain-e-pasdari-e-sahra na chhut saka

vaz-e-junun agarche badalte rahe hain ham

saaqi na multafit ho to piina haram hai

pyase bhi mai-kade se nikalte rahe hain ham

koi khalil jis ko na gulzar kar saka

tere liye is aag pe chalte rahe hain ham

kya jaane kab vo subh-e-baharan ho jalva-gar

daur-e-khizan men jis se bahalte rahe hain ham

pursan-e-hal kab hui vo chashm-e-be-niyaz

jab bhi gire hain khud hi sambhalte rahe hain ham

sahil ki ishraton ko khabar bhi na ho saki

tufan ban ke laakh machalte rahe hain ham

takhil-e-lala-kar ye kahti hai ai ‘surur’

koi zamin ho phulte-phalte rahe hain ham

Leave a Comment