lillah koi koshish na kare ulfat men mujhe samjhane ki
jalne ke alava aur koi manzil hi nahin parvane ki
Darne ko to kitne Darte hain rusva.i se vo divane ki
ik had to muqarrar kar dete zulfon ke liye lahrane ki
nazren to milati thiin un se kuchh baat na thi ghabrane ki
ai ishq magar ham chuuk ga.e ye choT thi dil par khane ki
qurbat ho ki duuri donon men ik kaif-e-mohabbat hota hai
ye bhi hai isi mai-ḳhane ki vo bhi hai isi mai-ḳhane ki
sayyad ne khul kar baat na ki jis din se qafas men aaya huun
malum nahin miTTi meri gulshan ki hai ya virane ki
saaqi tire lutf-e-am se ham vaqif hain magar ye yaad rahe
is daur men kam raas aati hai shishe ko dua paimane ki
is tarah mila kar pi jaana har rind ke bas ki baat nahin
thoḌi si kisi paimane ki thoḌi si kisi paimane ki
Leave a Reply