Poet
aaj phir band-o-salasil ka ḳhayal aaya hai
zulf-e-pur-pech ka aur dil ka ḳhayal aaya hai
phir bagule hain ravan bahr-e-qadam-bosi-e-shauq
qais ko laili-e-mahmil ka ḳhayal aaya hai
phir mah-e-gumbad-e-gardan se lagi hai baazi
ham ko apne mah-e-kamil ka ḳhayal aaya hai
aaj phir aankh se Tapka hai koi qatra-e-ḳhun
ba.ad muddat hamen phir dil ka ḳhayal aaya hai
karvan shauq ka hai paik-e-nazar se aage
duur se qurbat-e-manzil ka ḳhayal aaya hai
dil ko us but se hai phir ajr-e-vafa ki ummid
sa.i-e-be-sud men hasil ka ḳhayal aaya hai
bandh kar dashna-o-ḳhanjar jo nikal aa.e ho
aaj kya phir kisi bismil ka ḳhayal aaya hai
Leave a Reply