Duniya Ko Ru-Shanas-E-Haqiqat Na Kar Sake

duniya ko ru-shanas-e-haqiqat na kar sake

ham jitna chahte the mohabbat na kar sake

saman-e-gul-faroshi-e-rahat na kar sake

rahat ko ham sharik-e-mohabbat na kar sake

yuun kasrat-e-jamal ne luuTi mata-e-did

taskin-e-tishna-kami-e-hairat na kar sake

ab ishq-e-ḳham-kar hi arman ko de javab

ham un ko be-qarar-e-mohabbat na kar sake

be-mehriyon se kaam raha go tamam-umr

be-mehriyon ko sahne ki aadat na kar sake

kuchh aisi iltifat-numa thi nigah-e-dost

hote rahe tabah shikayat na kar sake

nakamiyan to farz ada apna kar ga.iin

ham hain ki e’tiraf-e-hazimat na kar sake

faḳhr-e-munasibat men tira naam le liya

ham ḳhud hi parda-dari-e-ulfat na kar sake

har-chand hal-e-dida-o-dil ham kaha kiye

tashrih-e-kaifiyat-e-mohabbat na kar sake

aflak par to ham ne bana.in hazar-ha

ta.amir koi dahr men jannat na kar sake

hamsa.egi-e-zahid-e-bad-ḳhu ke ḳhauf se

parvardigar teri ibadat na kar sake