Dil Pareshan Hi Raha Der Talak Go baiThe

dil pareshāñ hī rahā der talak go baiThe

apnī zulfoñ ko banāyā hī kiye vo baiThe

apnī sūrat pe kahīñ aap na āshiq honā

be-tarah dekhte ho aa.ina tum to baiThe

zulf uljhī hai to shāne se use suljhā lo

shaam kā vaqt hai ho koste kis ko baiThe

jā.ūñ kyā ek to darbān hai aur ek raqīb

jaan lene ko farishte haiñ vahāñ do baiThe

hai javānī bhī ajab chāhtā hai dil ‘tanvīr’

use taako use ghūro use dekho baiThe

Leave a Comment