Meri Aankhon Se Hijrat Ka Wo Manzar Kyun Nahin Jata

Prabudha Saurabh

miri ankhon se hijrat ka vo manzar kyuun nahin jaata

bichhaḌ kar bhi bichhaḌ jaane ka ye Dar kyuun nahin jaata

agar ye zaḳhm bharna hai to phir bhar kyuun nahin jaata

agar ye jan-leva hai to main mar kyuun nahin jaata

agar tu dost hai to phir ye ḳhanjar kyuun hai hathon men

agar dushman hai to aḳhir mira sar kyuun nahin jaata

bata.un kis havale se unhen bairag ka matlab

jo taare puchhte hain raat ko ghar kyuun nahin jaata

zara fursat mile qismat ki chausar se to sochunga

ki ḳhvahish aur hasil ka ye antar kyuun nahin jaata

mire saare raqibon ne zaminen chhoḌ diin kab ki

magar ash.ar se mere vo tevar kyuun nahin jaata

mujhe bechain karte hain ye dil ke an-ginat dhabbe

jo jaata hai vo yadon ko miTa kar kyuun nahin jaata